قضية تنظيم الأسرة من القضايا الهامة التى يجب أن تتصدر اهتمامات الدولة وتعديل الكثير من التشريعات التى تحقق نقلة حقيقية فى هذا الملف الدكتور عمرو حسن مقرر المجلس القومى للسكان السابق واستشارى النساء والتوليد يوضح فى سطور أهمية تنظيم الأسرة ويوضح الكثير من الحقائق للسيدات بشكل مبسط

هنتكلم عن تنظيم الأسرة ،استنى بس انت رايح فين !؟
لأ لأ مش هنجهض الأطفال ،ولا هنقتل الطفل الزيادة !!

خليني أقولك يعني أيه تنظيم الأسرة؟

دي خدمات شاملة ،تعليمية واجتماعية وطبية ، بتساعد الناس إنها تحدد عدد مرات الولادة،و الفترة الزمنية بين كل طفل والتاني، وطبعًا الوسيلة المناسبة لمنع الحمل.

ممكن كملخص نقول إنها عبارة عن خطة للحياة الإنجابية

طيب انتم بتتكلموا فى الموضوع ده ليه ؟

كتير من الناس ميعرفوش أخطار الزواج المبكر ،و الزواج فى سن متأخر للرجالة والستات،ولو كان السن مناسب هل الصحة مناسبة؟
مثلًا لازم الأم تستنى ٣ سنين قبل الحمل مرة تانية ،ولو أجهضت لازم تستنى ٦ شهور ، معلومات الناس لازم تعرفها عشان تضمن صحتها وصحة طفلها وبالتالي حياة أفضل .

لازم نهتم بصحة الأم علشان نتجنب أي مضاعفات ناتجة عن الحمل ،وده لأن فترة الحمل بتسبب الضعف والتعب للأم.
عايزين نتلاشى مشكلة الحمل غير المخطط.
وللتأكد من توافر الموارد اللازمة لتربية الطفل المادية أو المعنوية .
وعلشان العائلات اللي فيها عدد أقل من الأطفال،أغلبهم بيكملوا تعليمهم ،وبياخدوا الدعم العاطفي من أهلهم بشكل كافي ،لكن العكس في العائلات الكبيرة بنلاقي البنات ممكن ميكملوش تعليمهم بسبب المستوى المادي اللي بيكون دايمًا قليل ،وده بدوره هيأثر على الدولة وهيزود استنزاف الموارد والجهود.

النصايح دي بنوجهها لمين ؟

للكل!
لأن ده تفكير لازم يتغير ،عشان نوصل للهدف لازم الكل يكون عنده وعي كامل يعني أيه تنظيم الأسرة بدون أي اشاعات او معلومات غلط وملهاش أساس من الصحة.

طيب ازاي ؟
زي ما قولنا أهم حاجة هو العلم ، لما ننشر العلم ده كل شخص هيعرف الوسائل المتاحة له ،والطبيب المعالج هيوفر المعلومات المناسبة للسيدة بدون أي حرج، وبدون أي نظرة مسيئة أو اقتحام للخصوصية. وهنتغلب على كل الأساطير والخزعبلات اللي بتنتشر.

#بالطو_أبيض_لتنظيم_الأسرة
#كبسولات_تنظيم_الاسرة